vendredi, 02 juillet 2021 07:29

Haakakai no Puahaka – Légende de Puahaka – Ua Huna

 

Haakakai no Puahaka – Légende de Puahaka – Ua Huna
haakakaiìa e Edgard Fournier

I te tai òmua, e vai nei tēnei tohua i uta o Vaipaee, o Puahaka te inoa. I èià, e hakaìa nei no te haamakimaki tītahi vehine me te vāhana aòè âua i teka. Ua tupu tēnei koìna haka i Puahaka i te pō.

Eīa tēnei mou tama, o Hutahuta me te iâmutu i tītahi kēkē kaavai i Panakā.

E aha te hana... ?

E maka me te keâ. Ia topa te keâ i vāvena o tēnei tohua, mea nui âtou i mate. Ma hope mai, ua tiòhi te poì me i hea tēnei keâ. Ua ìte i hua mou ènana nei. I tātaiìa ai, aòè i koàna. Ua tihe hua mou tama i Teihiputa, ua kāòti i te kohe māoì no te hana paepae no âua no te rere atu i Nuku Hiva. Ua hoe, tihe mai ana tahipito, ua mamao, u pohuè.

  Tihe âua i Taiohae, ua popoki te hakaìki no Taiohae ia âua, tuku i òto o te ùa. Haaone ia âua e toù â.  Ia pao, ua tao no te kai.

fronde

(Maka ènana - Fronde marquisienne)

  Tēnei, i te ùa o te â, ua tupu tēnei tōua. O Aakapa me Hatiheu te tōua atu me Taiohae. U peàu te toa nui i te hakaìki :

  - « E pao tātou i te Aakapa me te Hatiheu. Mea nui oko tēnei poì. »

   Ua òno hua mou ènata nei i òto o te ùa, u peàu :

  - « E aha tenā, o māua e tōua io to māua henua, mea nui aè te poì. »

U peàu te hakaìki :

  - « A taki mai tenā mou ènana me i to he ùa. »

Hānai toitoi te hakaìki i tēnei mou tama.

No tēnei tōua, e ùa ava : o te ava nui me te ava iti. Peàu Hutahuta i te iâmutu :

  - « E hee òe i te ava iti, o au te èka mai i te ava nui. »

  Te tiheìa o te Aakapa i te ava iti, ua tōua me to Taiohae. Aê hina, ua hua to Taiohae. I te ava ua hua to Aakapa me Hatiheu, ua hee hua mou tama i to he ava e èka ai. U peàu hakaùa Hutahuta i te iâmutu :

  - « Ia tā, e kukumi e tahi, e tuku e tahi. »

galets2

  Tā te iâmutu, aòè e haapohuè, ta Hutahuta, e kukumi e tahi e vai e tahi, tēia aòè e koè te ènana me io teâ kaavai. Ua poto te ùu no teâ hana tā. Ua mate te toa o Hatiheu ia Hutahuta, kōtiaìa te upoko. Ia tihe tēnei mou ènana i àò, i mua o te hakaìki, ua peàu te hakaìki :

  - « I tēnei, e ìò na òuâ e haatee i tēnei henua. »

  U peàu hua mou ènata : 

  - « Haavai atii nei, o māua ma àò o òe. »

 Ua ìò hua mou māhaì e toa no Taiohae. Me i teâ â, ua peàu te hakaìki :

  - « Me i tēnei, e ìò mātou mea huumata no te Ua Huna. »

  Te haavivini tēnei, enā anatu to âtou maakau i te Ua Huna no te mea ua pohuè âtou i tēnei mou toa me i Ua Huna. Ia hee te poì i Nuku Hiva te hakatu o Tauamanaoa te tihe i Taiohae.

© Te Haè tuhuka èo ènana - Académie marquisienne – Takuùa/juillet 2021

 

Propulsé par CComment

Haatumu

Culture

Joomla Template by ThemeXpert