vendredi, 22 janvier 2021 04:30

Haakakai no Moanatapu – Légende de Moanatapu – Ua Huna

Haakakai no Moanatapu, haakakaiìa e Maurice Rootuehine

E vai nei i nā pō kākiu e tahi toa te inoa o Vaetiiakooua. Ua òno īa enā e tahi toa oko nui e èka nei i ùna o te motu o Uahuna.

I tītahi â, ua hee mai īa i Hane me to īa kahu kanahau me te paè huumanu kuà. Ua peàu te ati me i òto o tēnei kaavai henua :

« Pēhea te koàna o tenā tāpī me te paèkuà ? » 

Ua peàu Vaetiiakooua :

« E keì ôtou e tahi ùa e hitu maò te hātea, haapī me te vehie ; ia pao, ua tahu. Ia pūkiki te keâ, e kohi ôtou i te tau tamaòa, a tanu ia âtou i òto o te umu, haapī me te èpo, a haakao te upoko. »

Ua hana hua poì nei. Ua hiti Vaetiiakooua tihe io te Keaotekori, ua taaàu mei èià :

« A uai, a uai, a kai ! »

Te maakau o Vaetiiakooua, ia pao teâ tau tamaòa i te mamate, aè he toa no te tū i to īa ava.

rocher legende maurice uahuna Copy 2

Huì iho to hua tau poì, ua pao te tau tama i te mamate i òto o te umu. Too iho âtou i te taa no te veò ia Vaetiia, enā hua ènana nei i tītahi kēkē i te Keaotekori. Tihe âtou io te Keaotekori, ua tihe īa i Moanatapu.

Te huaìa mai o tēnei toa o Huihaoè mei Toohapu, ua òno īa ua hanapē Vaetiiakooua i te tau tamaòa no Hane.

Ua tuku īa e tahi moioè i vāvena o te ati a Vaetiiakooua no te tiòhi i te hana a teâ poì.

I tītahi â, ua òno īa ia Vaetiiakooua i te pōpahi i to īa poì e hee i te heke ùku. Ua èka me te tau vehine, o īa e kava inu. Ua hua te moioè io Huihaoè no te haki i ta īa mea i òno.

I èià Huìhaoè i te hitiìa ma Matukuoha topa atu i te kēkē me Taupatio, tihe i Hatupuku topa io he kaavai Hiniaehi. Piki i tītahi kēkē o Maaneva me te too i te tau manamana èitā, tāmau i ùna o te taakeo, te ùu, me he mea e heke, tēia e maakau tēnei ati o Vaetiia o to âtou poì. Te tiheìa o âtou io te vahi puàha, ua peàu te tau vehine :

« Enā to tātou poì e hiti ana. »

Te tihena o teâ poì i ùna, ua piki i ùna tootahi tootahi, i èià te ìtena o te tau vehine aè o to âtou poì tēnei, e poì e hee mai e hanapē ia âtou. Ua kaù Vaetiiakooua i te kava. Ua too te tau vehine i te tau tōìki, tūhao io he opata. Pao teâ tau vehine i te tūhao. I topaìa te inoa o teâ vahi o Moanatapu.

O Huihaoe to mua te i tihe i ùna. Ua tā Huihaoe ia Vaetiia e toù topaìa ùu i ùna. Ua maakau Huìhaoe ua mate Vaetiiakooua. Me te huhua o Huihaoè me to īa poì, ua tihe mai te tau vāhana me i te heke ùku. Ua ìte i te toa o Vaetiiakooua e moe nei, mea à, aòè i mate. Me te òno atu i te uē o tītahi vehine, e moî a Vaetiiakooua. Ua mau te hami i to he aka toa, aì mate. Na īa i haki te mea ua tihe Huihaoe no te kukumi ia Vaetiiakooua.

© Te Haè tuhuka èo ènana - Académie marquisienne – Âvea/novembre 2020

 

Propulsé par CComment

Haatumu

Culture

Joomla Template by ThemeXpert