jeudi, 28 janvier 2021 07:49

Haakakai o Tokaakia – Légende de Tokaakia – Ua Pou

 

Haakakai o Tokaakia haakakaiìa e Taiea EPETAHUI

 

E vai nei Pou, e toa io he tai. I ùka o tītahi tuaivi, e vai nei e tahi vehine pootu, o Teuumataevaeva, te vāhana e ika, o Tu te ikoa. Te peàu, no te tihe i ùka o hua mōuka mea menia, aòè e tihe pu. Mea à, e vai nei tītahi vahi ua kite Tu i te kori, ma îâ teâ ika i te hiti, mea pipii. Ua hiti. Tihe i ùka, ua kite i tēnei vehine pootu. Kiiete hua vehine.

  « Pēhea to koe tiheìa mai ? »

  « Ma he vaanui îâ. »

 Tēnei ika, e hua mai i te èvaìa â. Ua tihe hua ika i te tumu o te pou. Pūkanaìa Tu i tītahi kēkē o te avāputa. U tiòhi. Ia hiti tēnei ika, e kāvii te veò i ùka, te upoko i àò. E aha à, ua hiti, te tataìa me Tu, i tūàkiìa ai, topa i àò, mate havaiki.

poisson tokaakia

Teâ ava ana mai, ua pā te toto i te uma o Pou, na īa teâ ika, o ta īa tama :

 « Auē ta ù ika ua mate ! »

 I tēnei, e huke i te umu. Pēhea ?  E tāmahi toko. He mamahi toko. I hea ? Io he tohua i Pekia.  Ua tihe te mataèinaa o Tokaakia me te mataèinaa o Pou i ùka o hua tohua o Pekia, tītahi kēkē, tītahi kēkē.  I hee ai hua mou toa nei e tāmahi toko i vāveka o tēnei tohua. Tēnei, e tā te hoa e toù, e toù. E toù tāìa. I to mua tāìa, ua kaò Tokaakia tihe i te aò. U peàu te mataèinaa o Tokaakia :

« Aè mate Toka,

E arai Toka no Havaiki ! »

Topa hakaùa te toko. Tū toitoi oko. Enā ua àka Pou io he kohu. Ua taa te mataèinaa o Pou :

« Aè mate Pou,

E arai Pou no Pekia ! »

Topa hakaùa. Tū toitoi oko. E toù atii.

Te keàhiìa pāona a Toka, kaò ananu Pou, i hea oti te topaìa.

Pāpaki ananu te mataèinaa o Pou :

« Aè mate Pou,

E arai Pou no Pekia ! »

Aè kaò hakaùa, kaò ananu...

O Tokaakia te i tū mai, ua ìò īa te hakāìki o Pekia. Ua noho âua i èià me Teuumataevaeva.

 

© Te Haè tuhuka èo ènana - Académie marquisienne – Âvea/novembre 2020

 

Propulsé par CComment

Haatumu

Culture

Joomla Template by ThemeXpert