jeudi, 22 octobre 2020 07:57

Tekao no Haipuka - Légende de Haipuka - Ua Pou

 

TEKAO NO HAIPUKA

Haakakaiìa e Teikiutetoua Huuti me Inatio Ohotoua

Tēnei vehine i uta te noho. Ta īa vāhana io he tai te noho i òto o tītahi ana. I tēnei, ia tihe teâ vehine io tītahi ana i tai, u tapatapa. Ia òko ta īa vāhana, ua tihe me io he tai. E hee tēnei vehine i òto o tītahi kōava i èià e tiaki i ta īa vāhana. Ia hiti teâ ènana e keâ, e pukatai. Ia tukia īa i uta, u pohā teâ keâ. E ènana poèa te i koàka mai. O Haipuka to īa ikoa. E ùa vahi kaukau o tēnei mou ènana i Tahunamouka.

E vai nei i Hakamaii e tahi poèa. Ia hee tēnei vehine i tai e hakanana i ta īa hana. E kite ananu tēnei poèa i tēnei pootu ia mea ua heke i to īa tai kaukau. E toù o īa kiteìa i tēnei pootu e heke aa, u haamata īa i te hee e tiòhi. To īa heeìa, ua kite i tēnei vehine aê he kahu. Ua hano i hua vehine, nonoho âua. Mea à, enā te vāhana toitoi io he tai...

I tēnei hee ananu īa io ta īa vāhana toitoi. Ia tihe u tapatapa. Te kaòìa mai o Haipuka, u hoki i te namunamua ènana io he kii o ta īa vehine. Ua tuto hua vāhana e vāhana kē te moe nei me ta īa vehine. Ua hua ta īa vehine, aê īa i hana pē.

corail

I te huaìa hakaùa o teâ vehine, u peàu hua tama poèa me i Hakamaii, o tāua te hee i Tahunamouka. Te makimaki e hano e kukumi i teâ ènana i Tahunamouka.

I heke ai âua, u hakaea hua toa, u tiòhi. E aha à, ua hee hua vehine i òto o hua kōava aê he kahu, tiaki i ta īa vāhana. Te tiheìa mai o Haipuka, kukumi i hua vehine, mate nui.

I tēnei, ua ìte hua poèa me i uta i te kaòìa mai o tēnei keâ, puàha korero mai he ènana ... poèa....

Ua heke mai tītahi me i ùka, mea à ua mate te vehine i hemo ai ia īa. Tīoà hua ènana i te tau keâ me i uta, tīoà i òto o tēnei puka. Aî koàka i te tita o tēnei puka, pī i te tau keâ i òto, i pīpikièe ai âua. E tahi mamateìa o âua.

(HUUTI Teikiutetoua, hānau i te èhua 1938 ; OHOTOUA Inatio, hānau i te èhua 1939)

© Te Haè tuhuka èo ènana - Académie marquisienne – Âvea/novembre 2020

Propulsé par CComment

Haatumu

Culture

Joomla Template by ThemeXpert