Haakakai no Tavaka me Hakaohoka àakakaiìa e Georges Teikipoetahi KAUTAI

A haamaakau tātou i to tātou hoa, ia Teikipoetahi Kautai…

Io tēnei vāvāhenua, e vai nei te ati o Tavaka no Hohoi me te ati Kaavahopeoa no Hakaohoka. I tītahi â, u makimaki tēnei mou ati e mamahi. Ua heke to Tavaka me i uta. I tenā ava, e kaiìa te ènana. Me hua vaina ia hiti to Kaavahopeoa no te ùmihi i te puku kai ma uta, e kaiìa ia koàka. I tītahi ava, ua heke pūpū to Tavaka, me ta âtou haìna tōua. Te tiheìa atu i tai, u âvei me to Kaavahopeoa, u peàu :

  « E hee kōtou i hea ? »

  « E hee mai e tekatekao me kōtou. Makimaki mātou e mamahi me kōtou. »

Koàka ia âtou e tahi mākā pūùu keâkiva me io tēnei vahi peàuìa o Aumoehu. Ua amo to Tavaka òmua ana òa. Aî mamao te vahi i te amo, u hatutopa, u pao nui to Tavaka, ua topa te keâ. I too mai ai to Kaavahopeoa. Epō te too i hua keâ, u tuku âtou e tahi pootu ma ùka. Te ikoa o teâ pootu o Miitahia. Epō te hiti o teâ keâ, e haka òmua Miitahia ma ùka. Tēnei haka e ùta.

Miitahia a te pootu,

Pootu o te tai,

O te moana ìkuìku ;

Koi te koi i te koi tēia.

Miitahia à te pootu,

Moî a Upe me Hoka

E rere au ; e rere au i to he tai.

Kaù iti e kaù rui e,

Kaù iti e kaù rui e,

Ua tū te kaù

Me io he ivi e,

Me io he ivi e,

Me io he ivi.

A haka, a haka te kāòha

I ùka te tohua i Mauia.

A pae, paopao te menava,

Uhi mai te kahu

O Tavaka e !

Te tohua Mauia i Hohoi, Ua Pou

Enā amo to Kaavahopeoa i te keâ me hua pootu ma ùka, à à à, kaò i Patere.  Me i hua ava, i kātahi ai hua mou ati nei. U kānea âtou i te kai mēìa i te ìi o teâ poì. U mau te inoa o hua keâ o te Keatakiuta.

© Te Haè tuhuka èo ènana - Académie marquisienne – Takuùa/juillet 2021