vendredi, 10 décembre 2021 11:55

Haakakai o Akahee i te manu kuà – Légende de Akahee i te manu kuà – Fatu Iva

Haakakai o Akahee i te manu kuà haakakaitia e Roberto Tiri Maraetaata

 

     Tēnei toa e hee i te huumanu kuà i Aotona.

E vai nei tītahi hakaìtetina i ùna o tēnei tohua i Vaiai no te tau pootu me te koìna patutii o te tau toa poèpoèa. E tuutina rē teâ.

E vai nei tēnei ènata o Akahee, e hano e ape i te tau ènana motua no te faì ia âtou pēhea te òutee i Aotona. Mēìa i te hana nui o te koutee i Aotona, ua hakanā tahipito.

E tahi kooūa i faì pēhea te hee no te haakoàna i te manu kuà. U hakaìte īa e avai nei tītahi mou tama e keu â io te kaavai i Vaipio. Tēnei mou tama e keâ pehi no te haapana ma ùna o te vai. Na âua te keâ ìi aè ia pehi, e naò ma tītahi kēkē o te kaavai. Oiana nā tama e too no te hee i Aotona. A haapei mai e tahi vaa tauùa. E ono tekau ènata i òto o tenā vaa. E toù ènata kē : o nā tama me Akahee. Ua haapei i te kai haanui : te înaì, te vai me te pōpoi no te hee atu i Aotona. 

     Tēnei mou tama o âua te fatu o te manu kuà i Aotona. U pei nā mea paotū, u hee atu âtou i Aotona. Ua pao e tahi māhina, u naò i te hiku o te moana.

« Òe, no ai vaa, no ai vaa ? »

U haahua nā tama :

« No māua, no māua ! »

Ua ūi te fetū :

« O ai kōùa ? O ai kōùa ana ? »

U haahua nā tama :

« O māua tēnei o Pepeù me Hotunui, nā tama māhaì tivi e vii aa i te tua o te faè. »

U peàu te fetū :

« A tau i to hīa, a tau i to hīa ».

Puhi mai te metani me i àò o Aotona. O te hakako tenā i nā tama i te àve i te vaa tihe i Aotona.  Ua apatia te inoa o tenā mahina o Nāpeka.

Eīa nā ònohuu e ùa māhina : Nāpeka, Mataìki, Tuhua me Takeo, Takuùa, Èhuō, Māhinaihea, Oaoamanu, Âvea me Puàna, Mei, Èhua, Ūaòa me Ūahameàu, Pohe me Hatutii. Oiana te tetautina māhina tau i haamau i tēnei.

    manukua

Te manu kuà o Aotona - Lori de Kuhl, vini kuhlii

Ua tihe âtou i Aotona. U haavai nā tama i te vaa me nā nuina ènata i òto o tenā kaavai. Enā te manu e èka ana i òto o tītahi kaavai, e kaavai tapu.  U tihe âua i èià. Na âua i kohi i te huumanu kuà haapī e ono tekau kete. U hee mai i tēnei kaavai pītia ènata, u kai âtou i te kaina mau. Ua tihe i te ava e hua âtou. E hana kamo tēnei, e kamo aa âtou i te huumanu kuà me i Aotona. Tutūtia te manu i òto o te pāpua, aê he huu hakaùa. Eìa hua mou ènata i te taì o te vaa e huì aa i te tau kete huumanu. Ua naò te vaa, ua ìte te ènata me i Aotona, aê he huu hakaùa o te manu.

Ua hua mai tēnei i Vevau. Nui te ènata i matemate i òto o te huatina. E aha à, u too i te tino, u titii i to he tai.  Te tihetia mai i te fenua, me ta âtou tau kete huumanu kuà, tāpī i te tau pootu me te tau poèa i te pō tuutia rē i ùna o te paepae i Vaiai.

© Te Haè tuhuka èo ènana - Académie marquisienne – Mei/décembre 2021

Propulsé par CComment

Haatumu

Culture

Joomla Template by ThemeXpert