HAÈ TUHUKA ÈO ÈNANA

PUTUÌA I UA POU   

ME I TE 7 TIHE I TE 12 NO MĀHINAIHEA 

         Ua putu te tau mautoko o te Haè Tuhuka èo ènana i HAKAHAU me i te 7 tihe i te 12 no Māhinaihea.

         Ua tihe mai te nuina tuhuka èo i te â tapu 7 no Māhinaihea. Ua putu âtou ma hope o te kainamau no te hakatoitoi i te hakaheeìa hana no te ava putuìa.

         Ma te pō 8 no Māhinaihea i kātahi mai ai nā tuhuka e ùa o NUKU HIVA. U tīmata te putuìa i te pō a tahi 8 no Māhinaihea i te hora e 8. U èoapuu mai te Hakaìki Teve KAIHA i te tau tuhuka i kātahi mai.
         U hakahua atu te upoko hakatee Toti TEIKIEHUUPOKO i ta īa apuuìa mai.

• Tatauìa i te papatuhituhi o tēnei ava putuìa

        U tatau kātahi te tau tuhuka èo i te papatuhituhi o te ava putuìa.

• Te âveiìa ma he niutavavā me te tuhuka patuataha
  
  Mēìa i te toutakiìa a te tau tuhuka patuatahaè o te piika hana « Tropical architecture » i uu i òto o te hakatūpapahiìa atoìa haè no te pū hanaìa o te Kātahiìa haè mataèinaa o te Henua Ènana i HIVA OA, ua tupu tītahi àvaìa maakau taetae me âtou ma he tohua niutavavā.

• No te tūìa o Teautaipi TEIKITEKAHIOHO io te Pū CESEC
  
  E tū atu Teautaipi io te kōava o Maxime HAUATA, tuhuka èo o te « Kāruru Vananga » io te Pū CESEC no te ava e ùa èhua a tihe mai. U vavaò Toti ia Maxime no te hakatiàtohu i hua tumu hana. E hakarereìa tītahi hāmani io īa no te hakamaakau.
  
  

• No te niuaèo a te Haè Tuhuka Èo Ènana

         No te niuaèo Facebook, 5082 ènana mauhani me i te tīmataìa.

        120 ènana mauhani hou me i te putuìa i NUKU HIVA.

        Te nuiìa o te ènana mauhani, e ènana e noho nei i TAHITI.

        No te tohua niutavavā, 58431 ènana e vii nei me i te tīmataìa, 3941 ènana hou me i te putuìa i NUKU HIVA, 40 ènana e vii nei paotū te â. 

• No te hana kātahi me te Pū hana a te Hau henua

        Ua pao te tumu hana to mua me te pū hana a te Hau Henua :

• te nuina o tau ponatekao i hakaèoìa
• 60 avetekao ta âtou i hakaèoènana.

        Na te poì hana o tēia pū e hakahana atu i hua tau avetekao.

• No te tau putuìa i te tau pō e toù i TAIOHAE
  
   E putu ananu nei te tau mautoko e ìma o NUKU HIVA i TAIOHAE paotū te pō e toù. E hakarere âtou i te keèepoho o ta âtou vāhīìa hana i tau tuhuka paotū. Mea neke meitaì te hana. Atii, e neke ananu nei te hana hakamevahaìa a Teautaipi ma òto o te Pū « Te Òkonui ». Atika à, aê nui te maakau e hua mai me io te mataèinaa.
  
  

• No nā kōtūòmia « Kaakū » me « Conversation canaque »
  
  Ua hakatiàtohu mai Guy Wallart ua pao ia īa i te hakapoeka i tēnei mau kōtūòmia, u hakaheeìa e īa io te pū òomiìa i te henua Kina. Atika à, u tāpapa mai īa i te nuina hana ta īa i hakapao no te Haè Tuhuka èo ma te peàu aê īa i utuìa. Aê tū nei te maakau o te tau tuhuka me ta īa tekao. E hakarereìa atu tītahi keèe io Guy Wallart no te hakatoitoi i tēnei tumu hana.
  
  

• No te hakatoitoiìa i te hakaèoìa me te patuhei o te Pipiria
  
  E hana ananu nei te tau mautoko e ìma o NUKU HIVA i te pō e toù me Joseph HONG, tuhuka no te tau èo kākiu (hepereo, hereni) e tahi hora te òa no te haatoitoi i te haaèoìa me te patuhei o te Pipiria ma he èo ènana.
  
  

• No « EHU te kaiū ihovare »
  
  U poeka te âkakai i patuìa. U tīmata Elvina i te kokomo i te tau ata patuìa pātokoìa e tītahi tumu hakako ma te hakahana i te tīàva o te ìteatamai (IA). Atika à, u hakaēa te hana me hua tumu hakako no te koè o to īa ava. Na Teikiheitaa i hakapao me te hakapoeka.
  
  

• No te tutoiti « IAÈO »
  
  Ua pei te tutoiti IAÈO no te hakauu atu i òto o « Play Store » me « Apple Store ».
  
  

• No te òomiìa i te ponatekao tapapaìa
  
   Ua pei no te òomiìa. E pao no te putuìa i HIVA OA ma te 16 no Âvea.
  
  
  
• No te matahetū Mataìki patuìa e Toti
  
   U hakaàva mai Toti i te tau kite i ùka o te matahetū Mataìki ta īa i kapo mai me i òto o te tau nuina kōtūòmia ta īa i tatau me te tau hakaàvaìa maakau me te tītahi tau hoa me i Aoteaòa.
  
  
  
• Te tatauìa nūmera me te tatauìa moni
  
   Ua hakaàva mai Âtua i te tekao i ùka o te tatauìa nūmera tumu me te tatauìa moni vāàna e to tātou tau motua kui tupuna. Ôhia à, ua kēhuì te hakatu tatauìa moni i tēnei tai, mea hei ia hakavaaìa te hakatu kakiu ia mau i òto o te haa ènana. Ua ìò na te tau tuhuka èo e hakahana to mua.
  
  
  
• Te haììa i te koìka o te Haè Tuhuka Èo Ènana
  
  I te ava putuìa o te Haè Tuhuka Èo Ènana i ATUONA me i te 16 tihe i te 21 no Âvea, e haììa te koìka o te 25 èhua o to īa haatūìa. E pahiìa te keèe i te hakaìki me to īa tau toko no te kātahi mai i tēia koìka me te ape atu ia īa i tītahi pātoko haìna. E pahiìa te keèe io te :

• tau mautoko hakatee o te Hau Henua me te Hau nui : Kōmana, Mūtoi, Hakatee Kape
• te mataàama o te tau tumu hakako
• te tau hakatee haè hāmani

         Ua patuìa te papatuhituhi no tēia koìka e haììa i te 16 no Âvea, e tīmata i te hora e 8 tihe atu i te hora e 5 i te ahiahi.

         Ua hakaheiìa te tau tumu hana e hakaàvaìa atu :

• te tau kōtūòmia i òomiìa e te Haè Tuhuka Èo Ènana (Elvina, Sylvain, Ruto, Fiutoka)
• te niuaèo Facebook me te tohua niutavavā (Iakopo, Teikiheitaa)
• te tutoiti IAÈO (Iakopo, Teikiheitaa)
• te patuhei, pēpenaìa ponatekao, ponaàiê (Âtua, Teautaipi, Tumuehitu)
• te tau keuìa (Mata, Leone)
• te kumuhei me te taìēa (Sarah, Mano)
  
  
  
• No te Koìka Matavaa i UA HUNA
  
  Ua patuìa tītahi keèe io te Upoko aahi o te koìka Matavaa e haììa i UA HUNA ia hakatiàtohu mai īa i te vahi nohoìa o te tau tuhuka e kātahi atu. U hakahua mai īa ma te peàu u koàna tītahi haè nohoìa o te tau tuhuka. Ua ukaìa tītahi pāriri no te tau tuhuka no te ava Matavaa.

• No te tau ponatekao tāpapaìa
  
  U hakanekeìa te hana hakatoitoiìa i te tau ponatekao i pao i te hakaèoìa me te hakaèo i tītahi tau ponatekao kē atu. Ua pao 363 ponatekao i te hakatoitoiìa me te hakamanaìa.
  
  
  TE TAU TUMU TEKAO KĒ
  
  

• Te ava kaiako a Sandrine BONNEFIN
  
   Ua kōìma te upoko hakatee i te tekaotui no ta īa ava kaiako io te Haè Tuhuka Èo Ènana.
  
  

• Te keèe me io te hakatee hau no te hakaèoìa i tau tekao mana a te Hau
  
   Ua tatau kātahi te tau mautoko i tēia keèe me te hakaàva atu i to âtou maakau.

• Te koìka hakahetūìa ia Iakopo PELLEAU
  
   Ua haì te tau tuhuka èo me tītahi tau hoa i kātahi mai i te koìka hakahetūìa ia Iakopo no te hakakāìèìa ta īa hana tumu hakako me ta īa hana taetae nui no te èo ènana. U hakameitaì te Haè Tuhuka Èo Ènana ia īa ma òto o tītahi taki èo tupuna, te Pope o Kopo. Ua hakapaoìa te koìka ma òto o tītahi kainamau.
  
  

• Te hakahuaìa atu i te keèe me io te Haè Tuhuka èo tahiti – Fare Vāna’a
  
   E tū atu Âtua me Toti i te putuìa hakaàvaìa maakau i ùka o te pēpenaìa i te tau ponatekao hou i papatuhuìa e te Haè Tuhuka èo tahiti ma te 18 no Māhinaihea i o te Haè hakakoìa Tiketike.

            Ua hakaēa te putuìa i te 11 no Māhinaihea 2025, i te hora e hā i te ahiahi.