HĀMANI VĀHĪHANA HAAPOTOÌA O TE PUTUÌA I VAITAHU
ME I TE 25 TIHE I TE 29 NO ÈHUŌ 2024 (ÈO ÈNANA)

Ua putu te tau mautoko a te Pū tuhuka èo ènana i Vaitahu me i te 25 tihe i te 29 no Èhuō.

I to âtou tiheìa i Vaitahu, u apuuìa âtou e te hakaìki o Tahuata i vaièi mai i tītahi pāòto o te haèmataèinaa no ta âtou putuìa.

Na te upokohakatee i pepeù i te putuìa. U vaeìa Félicienne HEITAA e patu hāmani no tēnei ava putuìa.

I - No te niuaèo a te Pū Tuhuka Èo Ènana

E 4541 (= 1x4000 = 4000 = 1 mano) + (1x400 =400 = 1 àu) + 3x40 = 120 = 3 touhā) me te 20 ma 1) ènana mauhani me i te tīmataìa.

E 39095 ( = 9x4000 = 36000 = 9 mano) + (7x400 = 2800 = 7 àu) + 7x40 = 280 = 7 touhā ) ma 10 ma 5) ènana e vii nei io te tohua niutavavā

     Ua haameitaììa Iakopo PELLEAU no ta īa hana hakamevahaìa ma he niuaèo i tēia â i tēia â.

II - No te tutoiti o te kāputuèo

 Ua neke te hana.

III - No te tau putuìa i te tau pō e toù i Taiohae

E putu ananu nei te tau mautoko o Nuku Hiva i Taiohae paotū te pō e toù, mea neke meitaì te hana. No te tau pona tooa e hakatoitoi, ua hakapao te tau mautoko e putu nei i Vaitahu ia hakamevahaìa âtou ma òto o te niuaèo Facebook : tēia â, tēia pona tooa e hakatoitoi. U tīmataìa ma te pona tooa « tauturu ». Aua e peàu « tauturu », a peàu « pātoko ».

IV - No te hana kātahi me te Pū hana a te Hau henua

E neke ananu nei tēia hana. 160 (4x40 = 160 = 4 touhā) ponatekao i hakaèoìa, e toe nei te hakatoitoiìa i te ava o te putu nui.

Tōtahi atu, e patuìa tītahi hāmani i te kōmana Hau henua no te hakaūo i ta īa tau poì hana i te tekao ma he èo ènana, umoì anaiho i ta âtou ava hanaìa, atika à, i tēia â i tēia â. 

V - No te kouteeìa o Teautaipi i te Henua Initia

U hakaàva mai Teautaipi i to īa kouteeìa i te Henua Initia no te pāpuaìa i te Henua Ènana i òto o te Pū nui o te Aomāàma UNESCO. Ua tū atu īa ma te ikoa o te Motu Haka me te Pū Tuhuka èo ènana. Ua tūàka mai īa i tītahi tau ata kāvii no te tau hana i hakanekeìa.

VI - No te kōtūòmia « Kaakū » me « Conversation canaque »

Ua tatau kātahi te tau mautoko i hua mou kōtūòmia me i te tīmataìa tihe i te paoìa me te hakatoitoi i te tau tekateka, me te hakameitaì hakaùa atu i tītahi tau ponatekao me tītahi tau avetekao. Ua poeka te hana, e toe nei te hakahee atu i hua mau kōtūòmia io Guy WALLART no te òomiìa.

VII - No te haahuìkēìa i te papature aahi i te Pū Tuhuka Èo Ènana.

          Ua tatau kātahi te tau mautoko i te tau hakahuìkēìa o te papature aahi i te Pū tuhuka èo ènana, a te upoko hakatee o te Fare Vāna’a, Emmanuel NAUTA, i patu mai. Koè i hei te maakau o te tau mautoko me ta īa i patu. Ua hakahei âtou vāàna i ta âtou i hīa no te hakanui ake i te tau mautoko o te Pū Tuhuka Èo Ènana. Ua hakatoitoi âtou 11 kio paotū ; ua hakauu mai e 1 kio hou.        

          Ua poeka te hana. E toe nei te hakahee atu io te Pū hakateeìa hau o te haatumu.  

          U hakaàva mai te upoko hakatee i to īa maakau i ùka o te tau pātoko a te Pū tuhuka èo ènana e koàna e ape atu io te Hau nui à koè à io tītahi tau pū kē atu no ta īa tau aòhana.

VIII - No te haahuìkēìa i te papature aahi òto

          Ua tatau kātahi te tau mautoko i te papature aahi òto o te Pū tuhuka èo ènana ma te hakahuìkē e tahi avetekao anaiho. Ua hakamana te tau mautoko i te tau hakahuìkēìa o te papature aahi me te papature aahi òto.

IX - No te tau ponatekao tāpapaìa  

          Ua haatoitoi kātahi te tau mautoko 157 tau ponatekao i haaèoìa, akoè à i pēpenaìa i te tau ava putuìa i pao.

          I te pō paona, ua kātahi atu te tau mautoko io Tehaumate TETAHIOTUPA, tuhuka èo kāìèa no tītahi kainamau.

I te pō 29, ua huì kātahi mai te tau tuhuka èo ènana i te tau pōpahi hana na te tau tama hēhē me io te upokohakatee me i Ua Huna.

          Ua tomiìa te ava putuìa i Vaitahu i te pō 29 no Èhuō i te hora 10.