HĀMANI VĀHĪ HANA O TE PUTUÌA I TAIOHAÈ, NUKU HIVA (22_27/02/2026)

Ua putu te tau mautoko o te Haè Tuhuka èo ènana i Taiohaè me i te 22 tihe i te 27 no Ūaòa 2026

I – No te vāhīìa hana i hapaiìa i te òaìa o te èhua 2025

Ua vevete mai Fiutoka i te nuiìa hana i hapaiìa i te òaìa o te èhua 2025.
Ua tukuìa i te ìteatamai no te haapoeka i te vāhīìa hana no te hakarere atu io te Pū Haatee o te Haatumu i Tahiti.

II – No te haahouìa i te mataaahi o te Pū Haè Tuhuka èo

Ua tihe i te ava no te haahou i te Mataaahi. U haapao te mautoko i kātahi mai umoì e kēhuììa te Mataaahi.

III – No te tūìa o Teautaipi i òto o te Pū kaitutoìa o te pohuèìa ènana

I te 19 no Âvea, ua haamanaìa Teautaipi e mautoko no te Pū kaitutoìa pohuèìa ènana, na īa e tū atu no te Haè Tuhuka èo ènana. Ua tīmata ta īa hana io tēia pū i te 2 no Meinui io he kōava o Maximilien HAUATA i òto o te pāio hana a te pukemotu io nā pāòto e ùa : Taìēa – Toko atu, toko mai me te Haanekeìa-Tūtahiìa o te tau motu.

IV – No te Matavaa i Ùa Huna

Tokovaù mautoko i kātahi atu no te Matavaa i Ùa Huna.129 310 moni i koàna mai me i te hokoìa i te tau kōtūòmia a te Haè Tuhuka èo. U haamevahaìa te tutoiti IAÈO i te ava Matavaa, no èià i iti ai te hokoìa i te Tuhipona.

V – No te papaìahana no te èhua 2026-2027

Ua haamauìa te papaìahana no te èhua a tihe mai.

• I te meàma Nāpeka : putuìa i Fatu Iva me i te 21 tihe i te 24.
• I te meàma Tūhua-Takuùa : putuìa i Tahuata me i 28 o Tūhua tihe i 3 no Takuùa.
• I te meàma Mahinaihea : putuìa i Ùa Huna me i te 7 tihe i te 11.
• I te meàma Âvea i Ùa Pou : me i te 22 tihe 27.

E koàna ia kēhuì tēnei papaìahana.

VI – No te niuaèo Facebook

Aî kēhuì te tāpapaìa hana i ùka o te tapa niuaèo.

825 ènana mauhani hou me i te 19 no Âvea 2025.
5987 nuina ènana mauhani me i tīmataìa (Meinui 2020).
69025 ènana e vii nei i ùka o te tohua niutavavā.
6116 ènana hou me i te 19 no Âvea.

Te nui o te ènana tatau :

• I te tau haakakai-âkakai : 4704
• I te tau putuìa i te pō e toù : 4085
• I te papaìaèo : 2144

50-60 ènana vii ma he â e tahi.

No te Tutoiti IAÈO :

• Nui atu te ènana i rerekapo ia IAÈO me io App store. 3106 ènana i rerekapo me i te meàma Âvea 2025.

VII – No te tau putuìa i te pō e toù

Ua iti te haamevahaìa tekao a Teautaipi io te Pū « Te òko nui », me i to īa tūìa atu io te Pū kaitutoìa pohuèìa ènana.
Ua pao ònaòna te hana i ùka o te Pipiria.
E haarereìa te vāhīhana paotū te pō e toù ma hope o te putuìa.
Ua haaàva te tau mautoko i te maakau i ùka o te kapo koè o te ènana i tītahi tau pona i òto o te Tuhipona.
E maakauìa nei e keèe tītahi mou ènana ia tihe i te ava putuìa a te tau tuhuka èo.

VIII – No te hana kātahi me te Pū hana a te Hau Henua

Ua pao te amoka hana i tukuìa mai na te Haè Tuhuka èo.
U hakaēa te hana me te Pū hana a te Hau.

IX – No nā kōtūòmia « Kaakū » me « Conversation canaque »

Ua pao nā kōtūòmia i te òomi. Enā a tihe mai ma ùka o Aranui.

X – No te piika a tītahi tau mahiàma ènana « Mana in one »

Ua ape mai te piika « Mana in one » i te pātoko a te Haè Tuhuka èo no tītahi aòhana a âtou i ùka o te haaènana.
Ua âvei te tau mautoko e putu nei i te pō e toù me âtou ma òto o te tekaoata.

XI – No te tau apeìa no te haaèo e tihe mai nei io te Haè Tuhuka èo

E apuu te Haè Tuhuka èo i te tau apeìa me io te tau pū hana a te Hau.
Atika à, no ta tahipito e haahuaìa atu te tekao ia âtou :

• Ia haarere atu i ta âtou apeìa io te tau tuhuka haaèo ma vaho.
• Ia haaèo to mua i ta âtou hana, a tahi a haarere mai no te haatoitoi.
  
  

XII – No te tapatekao i patuìa e Toti i ùka o te tau matahetū me nā ikoa paraneta

Ua tatau hakaùa te tau mautoko i te tekao i patuìa e Toti i ùka o te tau matahetū.
E toe nei te tekao i ùka o te tau paraneta aî pao i te haatoitoi.

XIII – No te Matavaa i Hiva Òa

U tīmata te tau mautoko i te ùmihi i te vahi moeìa no tahipito o âtou no te ava Matavaa i Hiva Òa ma te èhua 2027, me he mea e keèeìa mai.

XIV – No te patuhei o te tau ikoatū

Mēìa te hana nui o te ati hou no te haahitipona i te tau ikoatū, ua haapao te Haè Tuhuka èo ia haahanaìa te tūkina, te haatoko me te uhiuhi i òto o tau ikoatū : te ikoa o te tau ènana me te tau vahi, te pāiohenua, me te tau henua.

XV – No te papaìaèo me te tau ponatū

No te tatau i tēnei tumu tekao, a pīòmi înei.

XVI – No te tau tumuhana e maakauìa nei e haapao

Ua tāpapa te tau mautoko i te tau tumuhana no tēnei èhua a tihe mai no te òomi i tītahi tau kōtūòmia ma te ape atu i te pātoko io tītahi tau pū a te Hau henua me te Hau nui.

• Tītahi tau takitakièka na te tau tama hou i patuìa e Tāhiafitiàni.
• Tītahi tau haapeiìa kai.
• Tītahi tau èitā hāika / teitā âpau / èitā rāàu.
• Tītahi tau âkakai i ùka o te pohuèìa o te ùa mou Tumukee.

XVII – No te ponatū kātahi « MEI »

E kaituto hakaùa te tau mautoko no te kēhuì i te haahanaìa i te ponatū kātahi « MEI » i te ava putuìa i Fatu Iva.

XVIII - No te tuhipona

Ua pao 326 ponatekao i te haaèo me te haamana.

No te tatau ia âtou, a pīòmi i înei.

E putuputu hakaùa te tau tuhuka èo i Fatu Iva i te meàma Nāpeka.